Се чини дека зад најголемата кражба на криптовалути во историјата, при што од „Binance“ – најголемата светска берза за криптовалути – беа украдени 6,3 милијарди долари, стојат севернокорејски хакери. Како што пренесува „Ројтерс“, најголемиот дел од средствата исчезнале за само 20 минути, а новите сознанија на експертите за сајбер-безбедност укажуваат на хакерска група позната како „TraderTraitor“, која е поврзана со севернокорејскиот режим.
Компанијата „TRM Labs“ од САД наведува дека со висок степен на сигурност го припишува нападот токму на оваа група. До сличен заклучок дојде и компанијата „Chainalysis“, додека „Elliptic“ откри врски со претходни кражби, за кои исто така постои сомневање дека се дело на севернокорејски хакери.
Иако американските власти и „Binance“ сè уште официјално го немаат потврдено идентитетот на напаѓачите, сознанијата од неколку независни безбедносни компании укажуваат на истата севернокорејска хакерска група. „TraderTraitor“ претходно се поврзуваше со некои од најголемите кражби на криптовалути, вклучително и нападот врз берзата „Bybit“ во 2025 година, при што беа украдени приближно 1,5 милијарди долари.
Според анализата на TRM Labs, напаѓачите префрлиле приближно 6,36 милијарди долари од дигиталните паричници на Binance преку десет различни блокчејн мрежи. Повеќето трансакции се случиле во текот на само 20 минути во четвртокот навечер.
Истражителите утврдиле дека подготовките траеле најмалку 36 часа. Хакерите првично извршиле неколку мали тест-трансакции за да проверат дали нивниот систем функционира, пред да го започнат главниот напад.
Анализата покажува дека тие успеале да преземат контрола врз инфраструктурата одговорна за одобрување на трансфери на криптовалути. Ова им овозможило да издаваат наредби со кои средствата се префрлале од паричниците на Binance на адреси што биле под нивна контрола.
Binance првично изјавија дека нападот веројатно започнал со компромитирање на лаптоп што му припаѓал на еден од нивните инженери. Сепак, дополнителната истрага открила и други точки на пробив.
„Ова беше сложен напад и правиме сè што е во наша моќ, во соработка со органите на прогонот, за да го расветлиме случајот“, наведоа од Binance.
Компанијата тврди дека, во моментов, нема докази оти приватните клучеви за дигиталните паричници биле украдени.
Доказите укажуваат на севернокорејската група „TraderTraitor“.
Експертите откриле неколку конкретни врски со Северна Кореја.
TRM Labs утврдија дека методите користени за подготовка и извршување на нападот се совпаѓаат со тактиките на групата „TraderTraitor“, која е специјализирана за кражба на големи количини криптовалути. Истата група се поврзува и со напад врз берзата Bybit во февруари 2025 година, при што беа украдени приближно 1,5 милијарди долари. Во тоа време, американското ФБИ официјално го припиша тој напад на Северна Кореја.
Еден особено значаен доказ беше откриен од компанијата Chainalysis. Нејзините истражители утврдиле дека дел од средствата украдени од Binance почнале да се мешаат со средства од претходен напад врз берзата Bitget – инцидент што исто така им се припишува на севернокорејски хакери.
Компанијата Elliptic потврди дека дел од украдените средства завршиле на адреса што веќе била поврзана со тој претходен напад.
Експертите, исто така, укажуваат на сличности во методите користени за пробив во системите. Групата позната како „TraderTraitor“ е препознатлива по тоа што ги таргетира вработените во компании за криптовалути, користи злонамерен софтвер и спроведува темелни подготовки пред да ја изврши самата кражба на средства.
Северна Кореја краде криптовалути за да го финансира својот режим.
Со години, севернокорејски хакерски групи вршат кражби на криптовалути од голем обем. Според американските и меѓународните истражители, средствата стекнати на овој начин служат како извор на финансирање за режимот на Ким Џонг-ун, вклучително и за неговите воени и нуклеарни програми.
Северна Кореја е предмет на опсежни меѓународни санкции кои го ограничуваат нејзиниот пристап до глобалниот финансиски систем.
Криптовалутите ѝ овозможуваат на земјата да дојде до средства, заобиколувајќи ги конвенционалните банкарски канали – иако истражителите можат да ги следат овие трансакции на јавно достапните блокчејн мрежи. Том Робинсон, коосновач на компанијата „Elliptic“, изјави за „Wired“ дека, доколку се потврди одговорноста на Северна Кореја, само оваа кражба речиси би ја удвоила вкупната вредност на криптовалутите што режимот ги украл досега.
„Binance“ и нејзините партнери успеаја брзо да замрзнат украдени средства во вредност од приближно три милијарди долари – главно во „стабилни монети“ (stablecoins), чии издавачи имаат можност да ги блокираат трансакциите.
Сепак, голем дел од преостанатите средства се наоѓаат во биткоин, етер и други криптовалути кои не можат лесно да се замрзнат.
Според проценките на „Elliptic“, околу 3,3 милијарди долари остануваат надвор од дофатот на ваквите мерки. Иако овие средства би можеле да бидат пресретнати доколку завршат на некоја берза за криптовалути која соработува со истражителите, не постои централен орган што би можел директно да ги блокира трансакциите.
Истражителите предупредуваат дека напаѓачите користат илјадници автоматизирани трансакции за да го прикријат движењето на средствата.
Од компанијата „Chainalysis“ известуваат дека наишле на досега невидени обрасци во прикривањето на паричните текови, што би можело дополнително да го отежне повратот на украдените средства.
Според „Reuters“, „Binance“ соработува со истражните органи ширум светот, вклучително и со ФБИ и со Тајната служба на САД – агенција која, покрај заштитата на американските владини претставници, истражува и финансиски криминали.
Од „Binance“ изјавија дека ќе ги покријат загубите користејќи сопствен капитал и резервен фонд, како и дека средствата на корисниците остануваат безбедни.
Ова претставува, убедливо, најголемата позната кражба на криптовалути во историјата. Претходниот рекорд го држеше нападот врз Bybit во 2025 година. Додека истражителите се обидуваат да ги лоцираат и блокираат преостанатите милијарди, наодите од неколку независни аналитички фирми сè повеќе укажуваат на истиот сторител: севернокорејската хакерска група TraderTraitor.