Спасувачите пронајдоа неколку тела додека цеделе вода по поројните поплави и лизгање на земјиштето предизвикани од обилните дождови на индонезискиот остров Суматра, во кои според новиот биланс, најмалку 26 лица загинале, а 11 се уште се водат како исчезнати.
Монсунските дождови и надојдените реки во четвртокот поплавија девет области во провинцијата Западна Суматра, а следниот ден, големото лизгање на земјиштето предизвика излевање на реката и поплавување на планинските села во областа Песисир Селатан.
Работата на спасувачите била отежната поради прекини на струја, оштетени мостови и патишта затрупани во кал и шут, соопшти Националната агенција за управување со катастрофи.
Портпаролот на агенцијата Абдул Мухари рече дека спасувачите пронашле уште тела, главно во најтешко погодените села во областа Песисир Селатан и соседната област Паданг Паријаман, со што бројот на загинати се искачи на 26.
Тој рече дека во одроните се затрупани најмалку 14 куќи, повредени се двајца локални жители, а се трага по уште 11 лица кои се пријавени за исчезнати.
Повеќе од 37.000 куќи и згради беа потопени во монсунските дождови во провинцијата Западна Суматра, рече Мухари. Најмалку три куќи беа однесени од поројот, а околу 666 беа оштетени, додаде тој.
Во поплавите оштетени се и 26 мостови, 45 џамии и 25 училишта, 13 патишта и два системи за наводнување, при што се потопени 113 хектари оризови полиња, како и неколку насади, објави агенцијата.
Обилните дождови предизвикуваат чести одрони и поројни поплави во Индонезија, архипелаг со повеќе од 17.000 острови.