Во изминатите 24 часа до 7 часот утринава, најниската температура во земјава е измерена во Маврови Анови и Берово 3 степени Целзиусови. Следуваат Крушево и Лазарополе со 4 степени, а 6 степени се регистрирани во Скопје-Петровец, Тетово, Прилеп, Крива Паланка и Претор. На Зајчев Рид во Скопје, како и во Битола, Струмица и Гевгелија, минималните температури изнесуваа 7 степени. Кавадарци, Куманово и Велес измерија 8 степени, Виница, Охрид и Штип 9, додека највисоката минимална температура е забележана во Демир Капија – 10 степени.
Според податоците за врнежите, најмногу дожд наврнал во Гевгелија – 15 литри на метар квадратен. Потоа следуваат Пожаране со 11 литри, Маврови Анови со 7, а во Пожар – Радовиш се измерени 6 литри. Тетово и Крушево добија по 5 литри, Лазарополе 4, Струмица и Битола по 2 литри, а најмалку врнежи има во Претор – 1 литар.
Денеска времето ќе биде облачно со повремени врнежи од дожд, кои во југоисточните делови од земјата ќе бидат пообилни, локално над 30 литри на метар квадратен за 24 часа. Ќе дува слаб до умерен југоисточен ветер. Максималните дневни температури ќе се движат од 8 до 13 степени.
Во Скопје се очекува облачно време со повремен дожд и слаб до умерен јужен ветер. Максималната температура ќе достигне до 12 степени.
