Непознати лица синоќа истуриле моторно масло врз сите реквизити и клупи на детско игралиште на улицата „Ѓорѓи Сугаре“ во општина Кисела Вода, во близина на основното училиште „Невена Георгиева-Дуња“, објавија згрозени жители на социјалните мрежи.
Според фотографиите споделени од граѓани, маслото е разлеано по лизгалките, клацкалките и клупите, што ги прави опасни за употреба и претставува сериозен ризик за децата и загадување на околината. Родители и жители побараа итно чистење на теренот и пронаоѓање на сторителите.
„Вака јавно да го прашам тој што ги поли со масло детските реквизити во паркчето каде што децата се радуваат од најмали до најголеми: дали сега помирно ќе спиеш, дали совеста ќе те копка? Не е до државата, не е до општината, до нас е. Лизгалките се наоѓаат на улица ‘Ѓорѓи Сугаре’, веднаш до зградата на Дабар. Се надевам дека некој ќе преземе нешто и ќе ги врати во првобитна состојба“, напиша револтирана скопјанка која ги сподели фотографиите.
Ова е најнов, досега најзлонамерен напад на урбана опрема во Скопје во последните месеци, период во кој јавноста беше вознемирена и од неколку случаи на уништување детски игралишта. Во еден од тие настани, група тинејџери во паркче во Карпош 4 кршеа корпи за отпадоци и турнаа уличен светилник.
Граѓаните очекуваат надлежните служби да го исчистат и обезбедат просторот за безбедна употреба, како и институциите да го расветлат случајот и да спречат слични вандалски напади во иднина.