Државниот завод за ревизија го објави извештајот за финансиската ревизија и ревизијата на усогласеност на Општина Охрид за 2024 година, во кој се нотираат повеќе неправилности и отстапувања од законската регулатива. Поради констатираните состојби е изразено мислење со резерва за реалноста и објективноста на финансиските извештаи, како и неповолно мислење за нивната усогласеност со пропишаните правила и политики.
Според ДЗР, утврдени се проблеми во делот на побарувањата, комуналните такси, урбанизмот, управувањето со јавните површини, бесправните градби, капиталните вложувања и поддршката на јавните претпријатија.
Ревизијата констатирала дека Општина Охрид не искажува побарувања од надомест за јавна чистота, иако ЈП „Охридски Комуналец“ со години не ги уплаќа овие средства во општинскиот буџет. За 2024 година претпријатието прикажало обврски од 22.880 илјади денари, а општината има поднесено тужби за претходните три години во износ од 53.831 илјада денари. Побарувања не се евидентирани ниту по основ на комунална такса за паркирање, која ЈП „Билјанини Извори“ исто така не ја уплаќа, со наведена обврска од 3.901 илјада денари.
Без одлука од Советот на Општината извршен е отпис на побарувања од 534 илјади денари и на претплатни салда во износ од 4.832 илјади денари за кои нема поткрепувачка документација. Во извештајот се наведува и дека даночните обврзници кои се стекнале со нов имот не се задолжени со данок на имот, ниту е пресметана камата за ненавремено плаќање.
Во урбанистичкиот дел, ДЗР нотира дека надоместот за уредување на градежно земјиште се пресметува врз основа на застарени одлуки, а дел од населените места немаат донесени урбанистички планови. Утврдени се градби и туристички капацитети без одобрение и без платен надомест. Постапките за легализација не се спроведуваат во законски пропишаните рокови, а и покрај издадени решенија за одбивање, не се преземени мерки за отстранување на бесправните објекти, што е спротивно и на „Планот за заштита на културното наследство“.
Ревизијата нотира дека за крајбрежниот појас не е донесен урбанистички план, а дел од угостителските објекти користат јавни површини без одобрение и без уплатена комунална такса. Урбаната опрема поставена на јавни простори не одговара на критериумите за монтажност и го нарушува сообраќајот.
Во извештајот се наведува и дека експропријацијата на земјиште во Велгошти е изведена преку спогодба со замена на државно земјиште со намена хотелски комплекс, при што постапката ја следи и Државното правобранителство поради прашања поврзани со заштитеното крајбрежје.
Во делот на капиталните инвестиции ревизијата утврди дека нема евидентирано право на сопственост за повеќе изградени објекти, а инфраструктурни проекти се реализираат без одобрение за градба и без проектна документација. По овој основ во 2024 година исплатени се 49.431 илјади денари.
Во секторот култура не е објавен јавен повик, а спортски субјекти кои не аплицирале добиле 37.400 илјади денари. На јавните претпријатија им се исплатени субвенции од 36.505 илјади денари без согласност од Советот и без програма за субвенционирање.
Ревизорите нотираат и недостатоци во сметководствената и материјалната евиденција, како и во пописните постапки, кои не се спроведени согласно прописите.
