Израел стана „најсилната сила на Блискиот Исток“, порача премиерот Бенјамин Нетанјаху на свеченост организирана за истакнати припадници на безбедносната агенција Шин Бет. Тој нагласи дека Израел целосно ја променил рамнотежата на моќта и одвраќањето во регионот, пренесува Times of Israel.
На вчерашниот настан што се одржа во резиденцијата на претседателот Исак Херцог, на кој присуствуваа и самиот Херцог, како и неодамна назначениот шеф на Шин Бет, Давид Зини, Нетанјаху подетално објасни како, според него, е постигната таа позиција.
„Најсилна сила на Блискиот Исток“
„Денес Израел се смета – и тоа без претерување – за најсилната сила на Блискиот Исток. Ја променивме целата рамнотежа на одвраќањето и моќта“, изјави премиерот.
„Тоа го постигнавме благодарение на истрајноста на нашиот народ, нашите војници, нашите команданти, во сите безбедносни гранки, и преку правилните одлуки што ги донесовме“, продолжи тој.
„Спречивме повеќе од 1200 напади“
Нетанјаху особено ги пофали неодамнешните успеси на Шин Бет во спречувањето терористички активности, истакнувајќи дека агенцијата успеала да спречи повеќе од 1200 напади, и покрај безпреседанските закани.
„Придонесот на службата во спречувањето на повеќе од 1200 напади е незамислив… Дојдовме до ситуација во која имаме најголем број предупредувања за терористички напади некогаш забележани, и најмал број навистина извршени напади“, заклучи премиерот.
