Антикорупцискиот тим на СДСМ денеска ја објави најновата „бомба“, која, како што тврдат, повторно го разобличува криминалниот модел на власта на Мицкоски и ВМРО-ДПМНЕ.
„Видовме како се пумпаат 9 милиони евра, пари на граѓаните, преку блиски луѓе и посредници. Видовме како се краде народот преку наместени тендери. Но, за старата банда тоа не е доволно – ненаситни се, мора да тераат бизнис лично и од дома, од фамилијата. Денеска објавуваме нов скандал, нова бомба! За тоа кој и како ‘чисти’?“ изјави Александар Саша Димитријевиќ.
СДСМ тврди дека сите траги водат до Ивица Томовски, висок функционер на ВМРО-ДПМНЕ и директор на Службата за општи и заеднички работи при Владата.
„Не чисти СОЗР – чисти семејната фирма на Томовски. А ‘чистењето’ се мери во милиони евра!“ нагласи Димитријевиќ.
Според објавените податоци, фирмата поврзана со Томовски, која го менувала името но не и матичниот број, од државни институции и општини добила:
5.360.000 евра
161 тендер
Со доаѓањето на ВМРО-ДПМНЕ на власт, како што посочи опозицијата, фирмата ја зголемила својата деловна активност за дури 306%, а само во 2025 година склучила 10 нови тендери во вредност од речиси половина милион евра.
„Случајно, им тргнало чистењето на буџетот. За што е Томовски во ВМРО-ДПМНЕ и во Владата мислам дека на народот му е кристално јасно после ова. Важно е фамилијарните бизниси да течат,“ додаде Димитријевиќ.
Според најавите, СДСМ во наредните денови ќе продолжи со објавување на нови материјали поврзани со случајот.
