Во новиот бран руски напади врз енергетската инфраструктура и стамбените објекти низ Украина, во текот на ноќта загинаа најмалку шест лица.
Русија лансираше стотици ракети и дронови, а погодени се 25 локации, вклучувајќи го и главниот град Киев, поради што многу области останаа без струја и греење, објави BBC.
Смрт и разурнување низ целата земја
Во напад врз станбена зграда во Дњипро загинаа две лица, а 12 се повредени, додека во Запорижја беа забележани три жртви. Премиерката Јулија Свириденко потврди на Telegram дека големи енергетски објекти во региите Полтава, Харков и Киев се оштетени.
Украинското Министерство за енергетика информираше за прекини во снабдувањето со електрична енергија во региите Дњепропетровск, Чернигов, Запорижја, Одеса и Кировоград, но Свириденко додаде дека итните служби работат на обновување и дека клучните објекти веќе се повторно поврзани, а водоснабдувањето се одржува со помош на генератори.
Во бројки и тврдења
Според податоците на украинското воено воздухопловство, Русија во текот на ноќта лансирала повеќе од 450 дронови и 45 проектили. Тврдат дека противвоздушната одбрана успеала да собори девет проектили и 406 дронови.
Од друга страна, руското Министерство за одбрана соопшти дека нивните сили собориле 79 украински дронови. Русија продолжува да тврди дека нејзините удари врз енергетската инфраструктура се насочени исклучиво кон украинската војска.
Зеленски: „Притисокот мора да се зголеми“
Руски напади врз украинската енергетика пред зимата стануваат вообичаен облик на војната. Аналитичарите сметаат дека оваа, четврта зима од почетокот на инвазијата, ќе биде голем тест за отпорноста на украинската одбрана.
Министрите од Киев изразуваат загриженост дека Москва со овие напади не се обидува само да го скрши моралот на населението, туку и преку колапс на енергетската мрежа да го запре целокупното стопанство.
Украинскиот претседател Володимир Зеленски порача дека овие напади покажуваат дека не смее да има „никакви исклучоци“ од западните санкции кон руската енергија.
Неговата реакција следеше само неколку часа по одобрувањето на едногодишно изземување за Унгарија од ограничувањата за купување руска нафта и гас од страна на САД.
САД минатиот месец санкционираа две најголеми руски нафтени компании
Во октомври, САД ги ставија на црна листа двете најголеми руски нафтени компании, заканувајќи се со санкции на сите кои од нив купуваат. Исклучокот за Будимпешта беше објавен во петокот, за време на посетата на унгарскиот премиер Виктор Орбан – близок сојузник на Доналд Трамп – на Вашингтон.
Во порака на Telegram, Зеленски нагласи дека „притисокот мора да се зголеми“ врз Русија. „За секој московски удар врз енергетската инфраструктура – насочен кон нанесување штета на обичните луѓе пред зимата – мора да постои санкциски одговор кој ќе ја опфати целата руска енергија, без исклучоци“, изјави тој. Додаде дека Украина очекува „соодветни одлуки од САД, Европа и Г7“.
