Во областа на Сараево, каде што претходно оваа недела беше прогласена епидемиска состојба поради ширењето на лептоспироза, заразна болест што ја пренесуваат глодари, потврдени се осум нови случаи.
Со ова вкупниот број на заразени лица се искачи на 43, објави во саботата Кантоналниот институт за јавно здравје.
Три лица моментално се лекуваат на Клиниката за инфективни болести, додека другите со потврдена инфекција се пуштени на домашно лекување и нивната здравствена состојба се следи.
Иако лептоспирозата може да предизвика сериозни компликации што можат да бидат опасни по живот, досега во Сараево не се регистрирани смртни случаи.
Во Сараево, во тек е засилена кампања за чистење на улиците поради лептоспироза.
Институтот за јавно здравје повторно апелираше до жителите на кантонот Сараево да бидат повнимателни и да избегнуваат контакт со локации каде што постои можност за инфекција, како што се нерегулирани места за отстранување на отпад или застоена вода.
Општина Нови Град се смета за епицентар на инфекцијата.
Иако лептоспирозата може да се пренесе преку домашни животни и домашни миленици, главни носители на инфекцијата се глодарите, особено стаорците.
Токму недостатокот на систематска контрола на глодари во последните три години доведе до нивно неконтролирано размножување, а тие на тој начин успеаја да ја прошират инфекцијата и кај луѓето.
Проценките на здравствените служби покажуваат дека бројот на штетни глодари во областа на Сараево сега е повеќе од еден милион, поради што се преземени итни мерки за контрола на глодари.
