По обилните врнежи од дожд кои вечерва предизвикаа поплави и хаос во Битола, Општината официјално информираше дека е започната голема акција за санирање на штетите. Сите расположливи екипи на јавните претпријатија се на терен.
Од Општината потврдуваат дека каналот на реката „Курделес“ е излеан, што ја прави состојбата најкритична во тој дел од градот.
Каде е најкритично?
Според информациите од локалната самоуправа, жариштата во моментов се:
- Кај стариот „Прогрес“: Поради излевањето на „Курделес“, сотежнат е сообраќајот на улицата „Македонска фаланга“ (поранешна „Иво Лола Рибар“) на потегот кон Железничката станица.
- Населба „Боримечка“: Интервенции се вршат на улицата „Солунска“.
- Лавчански пат и населба „Стрчин“.
Мобилизација: Се бранат и селата
Со оглед на најавите дека врнежите ќе продолжат, Општина Битола ги мобилизираше сите ресурси. Покрај екипите на КЈП „Нискоградба“, вклучени се и екипи од „Битолско поле“, „Водовод“ и „Стрежево“.
Акцијата се проширува и надвор од градското подрачје. Во текот на ноќта ќе се интервенира во:
- Кравари;
- Канино;
- Лера;
- Горно Српци;
- Критичните точки по течението на Црна Река.
Екипите остануваат на терен во текот на целата ноќ за да се спречат поголеми штети.
