На најголемите германски аеродроми, во понеделник, на 24 февруари, започнаа серија предупредувачки штрајкови, кои треба да кулминираат со дводневен штрајк на важниот аеродром во Минхен во четврток и петок.
„Во понеделникот, вработените во јавните служби на аеродромите во Келн/Бон и Дизелдорф престанаа да работат“, објави синдикатот на вработените во јавниот сервис Верди. Според информациите од чадорското здружение на германските аеродроми АДВ, во штрајкот биле погодени околу 48.000 патници, а откажани се околу 400 летови.
Се очекува дводневниот штрајк во четврток и петок во Минхен да има поголем ефект поради важноста на аеродромот за меѓународниот транзитен сообраќај, пишува Хина.
Синдикатот Верди сака да го зголеми притисокот врз работодавачите во преговорите за колективните договори. Синдикатите бараат зголемување на платите за осум проценти и дополнително олеснување преку вработување на нови работници.
„Зголемениот обем на работа и хроничното недоволно вработени се огромен товар за вработените“, рече портпаролката на Верди, Мануела Диец.
Штрајковите на аеродромите се продолжение на акциите на вработените во јавните служби кои минатата недела доведоа до прекин на јавниот превоз во голем број германски градови, вклучително и Берлин, каде вработените во метрото штрајкуваа минатиот четврток и петок.
