Цените на нафтата паднаа денеска на меѓународните пазари кон 93 долари поради предупредувањата дека светската економија би можела да западне во рецесија и слабата побарувачка на нафта во Кина.
На лондонскиот пазар цената на барелот по пладне беше за 1,49 долари пониска од моментот на вчерашното затворање на трговијата и изнесуваше 93,08 долари. Вчера тргувањето го затвори со добивка од 2,21 долар.
На американскиот пазар барелот денеска се тргуваше по пониска цена од 1,64 долари, од 87,47 долари. Вчера тој ја затвори трговијата во плус од 1,84 долари.
Трговците оваа недела беа загрижени од прогнозите за можна глобална рецесија, што би значело послаба побарувачка за нафта.
„Цените под притисок од значително намалените прогнози за побарувачката на нафта“
Меѓународната агенција за енергија (ИЕА) во четвртокот ја намали прогнозата за раст на побарувачката за оваа и следната година поради можна рецесија, по намалените проценки на Организацијата на земјите извознички на нафта (ОПЕК).
„Цените беа под притисок од значително намалените прогнози за побарувачката (за нафта), првенствено во наредната година“, велат аналитичарите на Commerzbank.
Нафтениот картел и неговите сојузници ја подигнаа прашината минатата недела со тоа што решија да го намалат производството од ноември за два милиони барели дневно од референтните нивоа.
ИЕА објаснува дека некои членки не успеале да ги исполнат своите квоти во изминатиот период, што значи дека ОПЕК + всушност ќе го намали производството за еден милион барели дневно.
Ситуацијата во Кина се следи
Трговците ја следат ситуацијата и во Кина, која со строги мерки се обидува да го потисне новиот бран на инфекција со Ковид. Бројот на заразени лица е мал според светските стандарди, но Кина спроведува политика на нулта толеранција за коронавирусот, што силно ги попречува економските активности, а со тоа и побарувачката за нафта.
Кочница за светската економија би можело да биде и повторното зголемување на каматните стапки во САД поради високата стапка на базичната инфлација во септември. Централната банка повторно ќе расправа за трошоците за задолжување на 1 и 2 ноември.
Во посебен извештај, ОПЕК денеска објави дека барел од нафтената кошница на нејзините членки во четвртокот изнесувал 93,66 долари, што значи дека цената паднала за 1,46 долари.