Здружението на граѓани „16-ти март“ ја презентираше својата визија за нов меморијален простор наречен „Патека на бесконечноста за 63-те ангели“. Станува збор за иницијатива за уредување на дел од Стариот парк, кој наместо бетонска масивност, ќе понуди спокој, зеленило и достоинствено сеќавање.
Идејата е да се создаде место кое не е само споменик што се гледа, туку простор што се чувствува – катче каде што граѓаните ќе можат во тишина да оддадат почит.
Симболика на бесконечноста
Централниот дел на решението е патека во форма на знакот за бесконечност (∞).
Според описот од Здружението, таа ќе биде изработена од природен камен или бел мермер, со нелизгачка површина, пристапна и за повозрасни и за лица со попреченост. Нејзината форма без почеток и крај симболично ја претставува вечноста на споменот и љубовта.
63 имиња врежани во мермер
Меморијалниот дел е замислен без агресивни форми и фотографии.
- Ќе бидат поставени 7 мермерни плочи.
- На секоја плоча ќе има по 9 имиња (вкупно 63 имиња) со годината на раѓање.
- Имињата ќе бидат врежани тивко и јасно, овозможувајќи му на секој посетител да застане и да се поклони.
Светлина и вода за утеха
Проектот предвидува посебна атмосфера во вечерните часови преку дискретна подна светлина која не заслепува, туку создава впечаток на „63 тивки светлини“.
Во еден мирен агол од патеката е предвидена фонтана со скулптура на Богородица.
„Тивко тече вода, се слуша само нежен шум. Тоа е простор за молитва, солза и утеха. Скулптурата не доминира – таа прегрнува со присуство, како мајка што чува“, стои во описот на идејното решение.
Во централниот дел ќе има подигнат простор за полагање свежо цвеќе, а целата околина ќе го задржи постоечкото зеленило, без огради, отворена за сите добронамерници.
