По денешниот протест на вработените во „Македонска пошта“, Синдикатот излезе со соопштение во кое информира дека проблемите со исплатата на јануарската плата се надминати и дека средствата веќе се исплатени на сите вработени.
„Како Синдикат, нашата цел е да ги заштитиме правата на вработените, но со јасна визија и преку ефикасен договор со кој ќе обезбедиме подобри услови за работа на работниците и работењето на АД ‘Пошта’“, стои во реакцијата. Од таму додаваат дека како организација даваат целосна поддршка на процесот на реформирање на претпријатието, вклучително и изработката на нова систематизација, со цел поштенската компанија да стане поконкурентна на пазарот.
Синдикатот наведува дека и во следниот период ќе остане фокусиран на обезбедување фер договор со менаџерскиот тим и на заштита на трудот на поштенските работници.
„Сметаме дека отворен дијалог со сите засегнати страни е единственото решение да ги оствариме правата на вработените во АД ‘Пошта’, а претпријатието да ја постигне својата цел како државен оператор во внатрешниот и меѓународниот поштенски сообраќај“, се вели во соопштението.
Утрово, вработените протестираа заедно со Сојузот на синдикати на Македонија, поради тоа што и покрај датумот 23 јануари платата сè уште не беше исплатена низ сите региони.
