Премиерот Христијан Мицкоски информира дека Владата, во координација со првиот заменик-претседател на Владата и министер за животна средина, Изет Меџити, остварила средба со директорот на Инспекторатот за употреба на јазиците, Арсим Идризи, како и со дел од вработените, со цел да се изнајде решение за исплата на заостанатите плати, кои вработените не ги примиле веќе пет месеци.
– Како резултат на конструктивниот дијалог и заложбата за институционална функционалност, донесена е одлука Инспекторатот за употреба на јазиците да премине под надлежност на Министерството за правда – соопшти премиерот Мицкоски.
Дополнително, се очекува наскоро да се усогласи Законот за Инспекторат за употреба на јазиците со Законот за организација и работа на органите на државната управа. Законот веќе е еден месец во собраниска процедура, а неговото усвојување ќе овозможи редовна исплата на платите.
– Бидејќи станува збор за прашање што се разгледува по Бадентер, очекуваме сите политички партии во Собранието да постапат рационално и без блокади, имајќи ја предвид егзистенцијата на семејствата на вработените – нагласи Мицкоски.
Најавена е и формирање работна група која ќе работи на целосна реорганизација на Инспекторатот и неговите надлежности.