За Јавното обвинителство во предлог-буџетот за 2027 година се предвидени 965,4 милиони денари, што е за 83,6 милиони денари, односно 9,5 проценти повеќе од буџетот за 2026 година. И покрај зголемувањето, предложениот износ останува значително под прагот од 0,4 проценти од државниот буџет предвиден во Законот за јавното обвинителство.
Државниот јавен обвинител Ненад Савески, прашан за финансирањето, изјави дека имал повеќе средби со министерката за финансии на кои разговарале за потребите на институцијата.
Тој нагласи дека работата на обвинителите е тесно поврзана со условите и финансиските можности со кои располагаат. Не соопшти колкав износ побарало Обвинителството, ниту дали добило уверување дека средствата ќе бидат дополнително зголемени.
„Исходот го чекаме и ние со нетрпение“, рече Савески, посочувајќи на постапката во Собранието. Во одговорот ја спомена и можноста потребите да бидат задоволени преку ребаланс.
Од вкупно предложените 965.393.000 денари, за потпрограмата „Јавно обвинителство“ се наменети 872.831.000 денари, а за Обвинителството за гонење организиран криминал и корупција 92.562.000 денари. Кај второто е предвидено зголемување од 13,5 проценти во споредба со 2026 година.
Најголемиот дел од вкупните средства — 699.016.000 денари, или 72,4 проценти — се планирани за плати, придонеси и надоместоци.
Членот 101 став 1 од Законот за јавното обвинителство предвидува најмалку 0,4 проценти од државниот буџет за тековната година, но ја врзува одредбата со праведна распределба на средствата и со тоа да нема влијание врз планираните расходни ставки.
Законот не прецизира дали процентот се пресметува врз вкупните приходи или врз вкупните расходи. Ако основа се приходите, предложениот износ за Обвинителството е за околу 616,4 милиони денари понизок од така пресметаниот праг. Ако основа се расходите, разликата достигнува околу 796,4 милиони денари.
За ограничените ресурси зборуваше и новата шефица на Обвинителството за гонење организиран криминал и корупција, Искра Хаџи Василева. Таа го оцени зголемувањето на буџетот како позитивен сигнал, но предупреди дека недостигаат и обвинители и кадар во јавнообвинителската служба.
„Ќе се трудиме со овие ресурси да направиме најдобро што можеме“, порача Хаџи Василева, додавајќи дека паралелно ќе продолжат напорите за обезбедување дополнителни ресурси.
Износите се дел од предлог-буџетот за 2027 година и сè уште не претставуваат конечно усвоени средства.