Во Етиопија е потврдена првата епидемија на смртоносниот марбург вирус, откако примероците од сомнителни пациенти дале позитивен резултат.
СЗО и Африканскиот центар за контрола на болести веднаш испратија помош и тимови за брза реакција за да се спречи ширењето на болеста, особено преку границата.
Според податоците на СЗО, регистрирани се девет случаи, меѓу кои и здравствени работници. Утврдено е дека станува збор за истиот сој кој претходно се појави во неколку земји од Источна Африка.
Марбург е исклучително заразен и често смртоносен вирус – почнува со висока температура, силни болки и главоболка, а кај многу заболени во рок од една недела доаѓа до внатрешно крварење. Не постои одобрен лек, иако во претходните епидемии биле користени експериментални терапии како ремдесивир.
Етиопија и Јужен Судан работат на спречување на ширењето на инфекцијата преку граница, што дополнително го отежнуваат слабата инфраструктура и преоптоварените здравствени системи во регионот.
СЗО веќе издвои 300.000 долари за итни мерки, испрати медицинска опрема, изолациски шатори и тим за брзи интервенции, бидејќи раната рехидратација и поддржувачка терапија можат значително да ги зголемат шансите за преживување.
