Повозрасен пациент кај кој е потврдено присуство на западно-нилска треска се наоѓа во животозагрозувачка состојба. Станува збор за 76-годишен скопјанец кој развил тешко воспаление на мозокот (енцефалитис) и во моментов е приклучен на респиратор.
Епидемиолошките анкети покажуваат дека пациентот во изминатиот период не патувал надвор од државата, што значи дека е заразен локално, односно од домашен комарец-преносител.
„За жал, 76-годишниот пациент има тешка клиничка слика и се наоѓа во Одделот за интензивна нега. Тој е поставен на респираторна поддршка бидејќи неговата состојба е критична. За разлика од него, останатите хоспитализирани пациенти се стабилни и се префрлени на лекување во Одделот за невроинфекции“, изјави д-р Фадил Цана, директор на Клиниката за инфективни болести.
Осум регистрирани случаи, вирусот се шири локално
Со овој случај, вкупниот број на официјално регистрирани лица заразени со западно-нилска треска во земјава се искачи на осум.
Надлежните алармираат дека најголемиот дел од евидентираните пациенти се лица на повозрасна возраст кои исто така немале историја на патување во странство. Географската дистрибуција на случаите покажува дека вирусот е најприсутен во Скопје и Велес, каде што се регистрирани мнозинството од заболените.
Здравствените сојузи апелираат до граѓаните, особено до постарите лица и хронично болните, да аплицираат мерки за заштита од убоди од комарци и да избегнуваат престој на отворено во близина на стоечки води во периодите кога овие инсекти се најактивни.