Првиот министер за правда во независна Македонија, Туше Гошев, гостуваше во специјалното издание на „Отворено студио“ на 4TV посветено на 35-годишнината од независноста на државата, каде се осврна на историските моменти од 1991 година и предизвиците со кои се соочувал првиот парламентарен состав.
Тој истакна дека 8 Септември е остварување на вековниот сон и желба пренесена од генерации Македонци, преточена преку Крушевската Република и АСНОМ, а потврдена преку референдумското изјаснување.
Со распишувањето на првите повеќепартиски избори во 1990 година, кандидатите за пратеници влегла со јасна визија и желба да се конституира самостојна и независна држава.
Во услови кога југословенската федерација се распаѓала, се донеле мудри и вешти политички одлуки кои овозможиле Македонија да стекне независност без ниту една човечка жртва, спротивно на мислењата дека држава се прави само со борба и конфликти.
„Нашата желба беше дека ние треба на мирен начин, со вешта политика, со многу знаење за формирање на држава, а не да припадаме на она група која мислеше дека само со жртви се правела држава“, рече тој.
Гошев посочи дека процесот не бил едноставен и имало спротивставени ставови, но фокусот бил ставен на градење модел за безбеден премин од федерација во суверена држава.