Генетиката, полот и возраста значајно влијаат на можноста за развој на срцеви заболувања, но постојат начини како можеме да си помогнеме и да го намалиме тој ризик колку што е можно повеќе. Многу стручњаци сметаат дека треба да се обрне внимание на секојдневните навики и да се избегнуваат оние што се штетни.
Една многу штетна навика – седењето
Постојана навика која многумина секојдневно ја практикуваат, а според кардиолозите и нутриционистите е многу штетна, е прекумерното седење и генерално седечкиот начин на живот, пренесува порталот Eating Well.
Седечкиот начин на живот – тивок непријател на здравјето
Начинот на живот кој подразбира часови поминати пред екрани и на работни бироа води кон сè поседечки начин на живеење. Долгото седење ја забавува циркулацијата, бидејќи телото не ги користи мускулите за да му помогне на срцето во пумпањето на крвта.
„Кога мускулите се неактивни, срцето мора да работи повеќе за да го одржи протокот на крв, што може да доведе до висок крвен притисок и задржување на крвта во нозете“, предупредува нутриционистката Вероника Раус. Истражувањата покажуваат дека луѓето кои долго седат имаат 34% поголем ризик од смрт предизвикана од срцеви заболувања.
Вишок килограми и почести воспаленија
Физичката неактивност придонесува за натрупување масно ткиво, особено висцерална маст околу органите. „Овој вид маст предизвикува воспалителни процеси во телото, што дополнително го зголемува ризикот од срцеви заболувања“, вели диететичарката Лиса Ендруз. Недостатокот на движење често води и до дебелеење, создавајќи маѓепсан круг кој е тешко да се прекине без свесни промени.
Ризик од инсулинска резистенција
Покрај вишокот килограми, предолго седење може да придонесе за развој на инсулинска резистенција – состојба во која телото станува помалку чувствително на инсулинот. Тоа доведува до пораст на нивото на шеќер во крвта и долгорочно го зголемува ризикот од дијабетес тип 2 – еден од водечките фактори за срцеви заболувања.
Дури и краткото движење носи значителни придобивки
Покрај тоа што спречува негативни последици, физичката активност носи и многу придобивки за срцето. „Само 20 минути дневно пешачење може да го намали крвниот притисок, воспаленијата и да помогне во регулирање на шеќерот и холестеролот во крвта“, истакнува кардиологот д-р Елизабет Клодас. Секое движење значи чекор поблиску до здраво срце.
Како да си помогнеме:
Вметнете кратки вежби во текот на денот: едноминутно истегнување, брзо одење или кратка прошетка.
Изберете медитеранска исхрана: многу овошје, зеленчук, маслиново масло, јаткасти плодови и интегрални житарки.
Не ги прескокнувајте лекарските прегледи: редовните контроли се клучни за навремено откривање и лекување проблеми.
Не го потценувајте сонот: трудејте се секоја вечер да спиете најмалку 7 часа за да му дадете на телото и умот време за одмор.
