Археолозите открија „неверојатен“ сет на римски скулптури на трасата на брзата железничка мрежа HS2 во Британија, чија прва фаза моментално се гради меѓу Лондон и Бирмингем.
Две целосни скулптури налик на маж и жена, плус глава на дете, се пронајдени во напуштена средновековна црква во Бакингемшир, јави Би-Би-Си.
Откритијата во старата црква Света Марија во Стоук Мендвил се испратени на специјалистички анализи.
Д-р Рејчел Вуд, водечки археолог во Fusion IV, кој работи на HS2, рече дека ова се „навистина ретки откритија во Велика Британија“.
„Да се најде една камена глава или еден сет на раменици би било навистина неверојатно, но ние имаме две целосни глави и рамења, како и трета глава“, рече Вуд.
Таа додаде дека скулптурите се многу важни за археологијата.
„Тие всушност ни помагаат да го промениме нашето разбирање за оваа локација пред да биде изградена средновековната црква“, рече Вуд.
Откриен е и хексагонален римски стаклен бокал со големи парчиња кои сè уште се недопрени, и покрај тоа што се верува дека биле во земјата повеќе од 1.000 години.
Археолозите работеа на локалитетот и околу 3.000 тела се извадени од црквата, која датира од 1080 година, а ќе бидат повторно погребани на друго место.
Од почетокот на работите во 2018 година, откриени се добро сочуваните ѕидови и структурните карактеристики на црквата, заедно со необични камени резби и средновековни графити, вклучувајќи знаци за кои се верува дека се сончеви часовници.
Се верува дека местото се користело како римски мавзолеј пред да се изгради норманската црква.
