Оваа година Русија започнува со производство на луксузни автомобили Аурус, во кои вози претседателот Владимир Путин, во поранешната фабрика на Тојота во Санкт Петербург, изјави вицепремиерот Денис Мантуров.
Aurus Senat, лимузина во ретро советски стил, е официјалниот претседателски автомобил со кој Путин пристигна на инаугурацијата во Кремљ во вторникот. Путин му подари една копија на севернокорејскиот лидер Ким Џонг Ун во февруари.
Мантуров рече дека производството во Санкт Петербург ќе започне на крајот на 2024 година и дека поранешната фабрика на Тојота одамна е предадена на Аурус, пренесува ТАСС.
Во март минатата година, Тојота ја предаде фабриката на државната компанија НАМИ, мнозинскиот сопственик на марката Аурус.
Aurus Motors започна со производство на автомобили во 2021 година во регионот Татарстан, на околу 1.000 километри од Москва.
Русија се обидува да ги активира фабриките откако некои светски производители се повлекоа од рускиот пазар по инвазијата на Украина во 2022 година.
Според аналитичката агенција Autostat, годинава досега во Русија се продадени 40 Aurus.
