На летото му се ближи крајот, што значи дека време е за подготовка на зимницата.
Во зима имаме малку овошје и зеленчук на располагање, а витамините тој период ни се уште попотребни отколку на лето. Најдобриот начин да ги сочувате, секако, е подготовка зимница. Ви предлагаме рецепт за шарена зимница, салата што е убава на око, но и многу вкусна.
Состојки:
- 1 кг кисели краставички
- 1 кг морков
- 1/2 кг зелен домат
- 1/2 зелени пиперки
- 1 кг карфиол
- 1 кг зелка
Прелив за салата:
- 750 мл алкохолен оцет
- 250 гр шеќер
- 150 гр сол
- 250 мл вода
- 1/2 литар масло
- 1 кесичка бибер во зрна
Подготовка:
Сиот зеленчук се мие и се сече на кругови, а зелката на тенки резанки. Морковот малку се бланшира (околу 5 минути), се лади, па се сече исто така на кругови.
Во тенџере се става вода, оцет, шеќер, сол, масло и бибер и се вари на тивок оган до вриење. Кога ќе зоврие, смесата се прелева врз зеленчукот што се реди во тегли.
Салатата е готова за употреба веќе наредниот ден.
