Петер Маѓар, лидер на партијата Тиса, која победи на парламентарните избори во Унгарија, изјави дека министерот за надворешни работи Петер Сијарто дошол во министерството утрово и почнал да уништува документи од чувствителна правна природа.
Како што рече, некои мислеле дека Сијарто исчезнал, бидејќи не бил во седиштето на партијата кога зборувал Виктор Орбан.
„Знаеме дека почнал да уништува документи, не само во министерствата, туку и во институциите што се поврзани со компании, што се поврзани со Орбан. Го кажав тоа за да знаете каква е ситуацијата во Унгарија. Кога имате партија што станала многу попопуларна од владата, тогаш очекувате поранешниот лидер да споделува информации со новиот лидер. Но, тоа не се случува тука, немаме информации“, додаде Маѓар.
Тој исто така вели дека има многу што тие не знаат.
„Постојат меѓународни договори, тајни владини одлуки донесени во времето на Орбан, документи за кои не знаеме ништо, многу од обврските што ги презела Унгарија, заеми што Орбан ги зел со камата за кои не знаеме ништо. Најважната задача ќе биде да се добијат сите документи, сè што останало по уништувањето, за да нашата влада остане функционална“, вели Унгарецот.
Тој нагласи дека ќе ги разгледа договорите и ќе објави сè што не ја нарушува тајноста.
„Да се покаже како стои државата, што оставиле ограбувачите зад себе“, вели тој.
