Промените на власт и доаѓањето на ВМРО-ДПМНЕ на чело на државата повторно кај дел од граѓаните ја отвораат темата за страв од можни полициски притисоци, следење и нарушување на приватноста, оцени поранешниот министер за внатрешни работи и актуелен пратеник Оливер Спасовски во емисијата „Ноќно студио“ на 4ТВ.
Тој посочи дека со актуелните политички случувања повторно се актуелизираат прашања поврзани со безбедносниот сектор и довербата на граѓаните во институциите, особено во делот на заштитата на приватноста.
Според него, ваквата состојба создава чувство на несигурност кај дел од јавноста и ги враќа дебатите за можни злоупотреби на системите за следење.
„Сериозно се поставува прашањето: зошто секогаш кога ВМРО-ДПМНЕ ќе дојде на власт, пред секој граѓанин се отвора таа перспектива дека некој може да нѐ следи, да нѐ прислушува и дека може да имаме одредени компликации во животот? Без разлика дали станува збор за следење или за инспекциски надзори од било кој тип со цел притисок, факт е дека во овој период повторно почнуваат такви стравувања кај граѓаните“, изјави Спасовски.
Тој нагласи дека државата веќе има воспоставен законски систем во кој мерките за следење се строго регулирани и контролирани, но предупреди дека тие механизми мора да останат исклучиво во функција на безбедноста и борбата против криминалот.
„Ние сега имаме уреди и системи кои се легално поставени и кои треба да служат исклучиво за безбедноста на државата и борбата против криминалот. Граѓаните не смеат да живеат во страв дека тие системи ќе се злоупотребуваат за политички притисоци“, заклучи Спасовски.