Граѓанската иницијатива „Support Kocani“ упати писмо со сочувство и понуда за конкретна помош до Амбасадата на Швајцарија во Скопје, по повод катастрофалниот пожар во ски-центарот Кранс-Монтана. Повикувајќи се на сопственото болно искуство од трагедијата во Кочани во 2025 година, здружението се понуди да го сподели своето знаење за менаџирање со кризи.
Во писмото адресирано до амбасадорот Кристоф Сомер, од иницијативата изразуваат длабоко сочувство до семејствата на загинатите и повредените во пожарот во барот „Le Constellation“.
Искуство стекнато преку трагедија
„Support Kocani“ потсетува дека и самите произлегле од слична трагедија – пожарот во дискотека во Кочани на 16 март 2025 година.
Тогаш, во соработка со локалната заедница и институциите, тие развиле и имплементирале централизиран систем за:
- Прибирање и регистрација на податоци;
- Менаџирање на информации за засегнатите поединци и семејства;
- Транспарентна и координирана дистрибуција на хуманитарна помош, медицински ресурси и психосоцијална поддршка.
Нудат „know-how“ за кризен менаџмент
Врз основа на ова искуство, здружението сега на Швајцарската Конфедерација ѝ ја нуди својата експертиза во структурирано управување со информации и координирана испорака на помош.
„Во дух на солидарност и взаемна помош, иницијативата со почит ја изразува својата подготвеност да сподели релевантно искуство и да обезбеди консултации доколку тоа се смета за вредно во справувањето со последиците од трагичниот инцидент во Кранс-Монтана“, стои во дописот до амбасадата.
