Добра вест за возачите кои патуваат кон Охрид и Струга. СВР Охрид ја извести јавноста дека од денеска, во редовен сообраќај е пуштен сообраќајниот крак – клучката на автопатската делница Охрид-Кичево, кај селото Подмоље (Општина Дебрца).
Со ова се става крај на досегашните пренасочувања и ограничувања во овој дел. Од денеска е воспоставен нормален тек на сообраќајот во сите клучни правци:
- Охрид – Кичево – Скопје;
- Охрид – Струга;
- Струга – Кичево – Скопје;
- Струга – Охрид.
Клучката е во редовна функција без дополнителни сообраќајни ограничувања, што значително ќе го намали времето на патување и ќе ги намали гужвите, особено сега во пресрет на празничниот викенд.
Апел од полицијата: Внимавајте на новата сигнализација
Иако патот е отворен, од СВР Охрид испраќаат важен апел до возачите да не ја злоупотребуваат новата делница за брзо возење.
„Апелираме до возачите на патнички и други моторни возила, при користење на овој сообраќаен крак, како и на целата автопатска траса, да ги почитуваат сообраќајните правила и прописи, како и поставената хоризонтална и вертикална сигнализација, и со тоа да придонесат за зачувување на сообраќајната безбедност“, велат од полицијата.
