Министерот за здравство Арбен Таравари денеска одговорајќи на новинарско прашање изјави дека го прочитал извештајот во врска со седуммесечното бебе кое почина на Детската клиника во Скопје, и во него е констатирано дека нема лекарска грешка.
-Извештајот пристигна, јас го прочитав уште во понеделник. За среќа, професионалците констатираа дека докторите немаат никаква грешка, рече Таравари на денешната прес-конференција.
Прашан каде бил проблемот за смртта на седуммесечното бебе, Таравари одговори дека најверојатно бебето е донесено подоцна на Клиниката.
-Можеби болеста си го направила своето, можеби подоцна е донесено детето. Меѓутоа, констатирано е дека нема лекарска грешка, додаде Таравари.
Седуммесечно бебе починало на 16 декември на интензивна нега на Детската клиника во Скопје.
Државниот санитарен и здравствен инспекторат (ДСЗИ) изврши вонреден инспекциски надзор на Детската клиника по трагичниот случај со седуммесечно бебе кое почина, а инспекторатот предложи Министерството за здравство да покрене постапка за стручен надзор над лекувањето на бебето.
Според информациите, на 11 декември, во вечерните часови, бебето повторно било донесено на Детската клиника и поради влошената клиничка слика било хоспитализирано на Одделот за неврологија. Креирани му се упати за повеќе испитувања, а на 13 декември, по натамошно влошување на здравствената состојба, бебето било трансферирано на Одделот за интензивна нега и терапија.
Откако во јавноста се појави веста за смртта на бебето, директорот на Детската клиника, Реџеп Мемеди, истакна дека сите процедури и третмани биле спроведени согласно стандардите и дека нема лекарска грешка. Тој додаде дека се работи за неоснован притисок врз Клиниката и здравствениот персонал, кој се обидува да го изврши својот труд во најдобар можен начин.
