Полицијата во Винтертур, Швајцарија, уапси шест лица по физичка пресметка што се случила во вторникот вечерта. Меѓу приведените има и двајца малолетници од Северна Македонија, на возраст од 15 и 17 години.
Инцидентот во областа Винтертур-Сенхоф бил пријавен малку пред 21:00 часот, кога полицијата добила повик за лице кое лежи на земја со повреди на главата. Пристигнатите патроли на местото на настанот затекнале повеќе учесници.
Пресметка со бибер-спреј
Според првичните информации од истрагата, претходно избила жестока расправија меѓу групата, при што бил употребен и бибер-спреј. Во инцидентот полесни повреди заработиле три лица – државјани на Сирија на возраст од 48, 18 и 17 години, кои со возило на брза помош биле пренесени во болница.
Повреден бил и 15-годишен тинејџер од Северна Македонија, кој, според полицискиот извештај, самостојно се упатил во болница за контрола.
Кој сè е уапсен?
Полицијата привела и испрашала вкупно шест лица кои биле инволвирани во тепачката. Меѓу уапсените се:
- Тројцата повредени Сиријци;
- Двајца државјани на Северна Македонија (на 17 и 15 години);
- Еден 16-годишен Швајцарец.
Сите учесници ќе одговараат пред надлежните органи, односно пред Обвинителството за малолетници или Јавното обвинителство, во зависност од нивната возраст.