Во 15 градови ширум Италија е издаден црвен метео аларм, додека екстремно високите температури се шират низ јужна Европа.
Алармот, кој предупредува на ризици дури и за здрави луѓе, ќе важи во наредните денови за некои од главните туристички дестинации, меѓу кои Рим, Фиренца и Болоња.
Следната недела во Европа се очекуваат потенцијално рекордно високи температури бидејќи се приближува нов топлотен бран.
Европската вселенска агенција (ESA) соопшти дека Италија, Шпанија, Франција и Германија би можеле да поминат низ екстремни временски услови.
ESA ја следи температурата на копното и морето преку сателит.
Највисоката температура досега забележана во Европа беше 48,8 степени, измерена на Сицилија во август 2021 година, а синоптичарите велат дека слични температури може да се постигнат и во наредните денови.
Италијанската влада ги советуваше граѓаните во црвените зони да избегнуваат изложување на сонце денеска во периодот од 11 до 18 часот и посебно да се грижат за старите лица или лицата со лоша здравствена состојба.
Во Грција претходните денови беа забележани температури од 40 степени, а Акропол, една од најпопуларните туристички атракции, во петокот беше затворен поради екстремните горештини.
Исто така, постои загриженост дека може да се појават шумски пожари, особено во области со силен ветер.