Канадскиот премиер Марк Карни денес изјави дека неговите разговори со кинескиот претседател Си Џинпинг се „пресвртница“ во затегнатите односи меѓу Кина и Канада што траат веќе неколку години.
Вчерашните разговори меѓу кинескиот претседател и канадскиот премиер, на маргините на самитот на Азиско-пацифичката економска соработка (АПЕК) во јужнокорејскиот град Гјонгџу, беа први меѓу лидерите на двете земји од 2017 година.
„Сега го деблокиравме патот за решавање на актуелните проблеми“, изјави Карни пред новинарите во Гјонгџу, објаснувајќи дека сега има „директна линија“ со Пекинг. „Нашата општа дискусија беше конструктивна“, рече тој, додавајќи дека го покренал прашањето за „странско мешање“ во Канада што му се припишува на Пекинг.
Карни прецизираше дека ја прифатил поканата на Си Џинпинг да ја посети Кина „на почетокот на следната година“. „Ги замолив нашите министри и функционери да работат заедно за да најдат решенија за актуелните предизвици и да идентификуваат области за соработка и раст“, рече тој.
Односите меѓу Пекинг и Отава се заладија во 2018 година по апсењето на шефот на кинеската технолошка компанија „Хуавеј“ во Канада и притворањето на двајца Канаѓани од страна на Пекинг под обвинение за шпионажа.
Во јули, Марк Карни објави царина од 25 проценти за увоз на неколку категории челик од Кина. Следниот месец, Пекинг соопшти дека ќе започне со воведување привремена царина од 75,8 проценти за увоз на канадска канола, маслодајно семе што се користи за храна и биогорива.
Но, Канада сега можеби бара поблиски врски со Пекинг за да се спротивстави на царинската офанзива на САД што ја загрозува нејзината економија, според АФП.
Канадскиот премиер во понеделник изјави дека му се извинил на американскиот претседател Доналд Трамп за политичката реклама против царините, велејќи дека му рекол на премиерот на Онтарио, Даг Форд, да не ја емитува, објави Ројтерс.
It’s official: Ontario’s new advertising campaign in the U.S. has launched.
— Doug Ford (@fordnation) October 16, 2025
Using every tool we have, we’ll never stop making the case against American tariffs on Canada. The way to prosperity is by working together.
Watch our new ad. pic.twitter.com/SgIVC1cqMJ
Карни, зборувајќи со новинарите по учеството на Азиско-пацифичкиот самит во Јужна Кореја, рече дека приватно му се извинил на Трамп на вечера што ја организираше јужнокорејскиот претседател во среда. „Му се извинив на претседателот“, рече Карни, потврдувајќи ги коментарите на Трамп вчера.
Карни, исто така, потврди дека ја прегледал рекламата со Форд пред да се емитува, но рече дека се спротивставува на нејзината употреба. „Му кажав на Форд дека не сакам да продолжам со рекламата“, рече тој.
Рекламата, нарачана од Форд, отворен конзервативец кој понекогаш прави споредби со Трамп, користи клип од републиканската икона и поранешен претседател Роналд Реган, кој вели дека царините предизвикуваат трговски војни и економска катастрофа.
Како одговор, Трамп објави дека ги зголемува царините за канадските стоки, а Вашингтон, исто така, ги прекина трговските разговори со Канада.