Американскиот претседател Доналд Трамп постхумно го одликуваше десничарскиот активист Чарли Кирк со највисокото цивилно признание во САД – Претседателскиот медал на слободата.
Кирк, кој требаше да наполни 32 години на денот на церемонијата, беше застрелан на универзитетски кампус во Јута на 10 септември годинава. Во негово име наградата ја прими неговата сопруга Ерика Кирк, на свеченост одржана во градината на Белата куќа.
Во своето обраќање, Трамп го опиша Кирк како „вистински американски херој“, нагласувајќи дека неговата организација „Turning Point USA“ прераснала во највлијателната конзервативна младинска платформа во земјата.
„Неговото име ќе остане засекогаш запишано меѓу хероите на Америка – тој беше маченик за вистината и слободата“, изјави Трамп.
Ерика Кирк одржа емотивен говор, велејќи дека не постои поголема чест од ова признание:
„Седум и пол години барав совршен подарок за неговиот роденден, а денес, господине претседателе, можам да кажам дека му го дадовте најубавиот подарок што можеше да го добие.“
Чарли Кирк ја основа „Turning Point USA“ во 2012 година, на само 18 години. Беше познат како гласен промотор на конзервативните вредности и поддржувач на Трамп, но и како контроверзна фигура која често се соочуваше со критики поради изјави што неговите противници ги оценија како расистички и дискриминаторски.
За неговото убиство е обвинет дваесетгодишниот Тајлер Робинсон, кој се соочува со можност за смртна казна доколку биде прогласен за виновен.
