Американскиот претседател, Доналд Трамп, повторно упати остри критики кон европските сојузници, прозивајќи ги поради континуираното купување на руска нафта и побара целосен прекин на увозот како дел од притисокот врз Москва за запирање на војната во Украина.
За време на говор на вечера во Маунт Вернон, Вирџинија, Трамп изрази подготвеност да ги зголеми економските санкции кон Русија, но истовремено ги осуди „оние за кои се бориме што сè уште купуваат руска нафта“.
„Европјаните купуваат нафта од Русија – тоа не би требало да се случува, нели?“ изјави Трамп.
Иако повеќето европски земји официјално го прекинаа директниот увоз на руска нафта по инвазијата на Украина во 2022 година, анализите покажуваат дека дел од снабдувањето сè уште продолжува, особено во источниот дел на Европа. Дополнително, некои земји индиректно увезуваат руска нафта преработена во дизел гориво во трети земји, како Индија и Турција.