Состојбата со врнежите останува сериозна ширум целата држава. Според најновиот извештај на Центарот за управување со кризи (ЦУК) заклучно со 18:00 часот, најкритично е во Охридско и во Штипско-кочанскиот регион каде има излевања на реки, додека во Тетовско е регистрирано уривање на потпорен ѕид.
Еве ја деталната состојба по региони:
ШТИП И КОЧАНИ: Излеани три реки, полицијата регулира сообраќај
Во источниот дел водостојот на реките е драстично зголемен.
- Кочанска Река: Се излеа локално кај селото Горни Подлог – механизација на КЈП Водовод веќе интервенира.
- Оризарска Река: Излевање има кај селото Грдовци. Таму интервенира Водостопанство „Брегалница“, а полицијата го обезбедува местото и го регулира сообраќајот.
- Зрновска Река: Излеана е пред вливот во Брегалница.
- Одрони: На патниот правец Македонска Каменица – рудник Саса има одрон каде интервенира „Македонија Пат“.
- Напомена: Злетовска Река и Брегалница се со висок водостој, но засега се во коритата.
ОХРИД И КИЧЕВО: Населува Далјан под вода, во Кичево се грижат за евакуираните
Во Охрид, најкритична е состојбата во населбата Далјан каде се излеа реката Далја. На терен е вистинска мобилизација: ЈП Водовод, Нискоградба и Комуналец работат со механизација, додека Противпожарната единица и Дирекцијата за заштита и спасување (ДЗС) испумпуваат вода од поплавените објекти. Се штити и патот кон селата Ливоишта и Вапила од надојдената Коселска Река.
Во Кичево, состојбата на поплавената улица „Прилепска“ е непроменета. Црвениот крст и Општината се грижат за евакуираните семејства, додека екипите продолжуваат со испумпување.
ПОЛОГ: Падна ѕид во Мала Речица, се чисти Шапка
Во Тетовско, екипите се борат на повеќе фронтови:
- Мала Речица: Полицијата и инспекторите се на терен поради уривање на потпорен ѕид.
- Желино: Интервенции кај Стримница и Палатица поради излевања.
- Попова Шапка: Приватна фирма со механизација го расчистува патот.
ПЕЛАГОНИЈА И КУМАНОВО: Превенција и испумпување
- Битола: Се интервенира во населбата Стрчин, се расчистува регионалниот пат Р-2333, а будно се следат реките Шемница и Црна.
- Ресен и Демир Хисар: Се врши испумпување на вода од загрозени површини.
- Кумановски регион: Се врши превентивно посолување и расчистување на ризичните патни делници во Куманово, Липково и Крива Паланка.
