Велат дека „еден лимон на ден менува сè“ – еве колку вистина има во тоа

На социјалните мрежи постојано се појавуваат совети за „детокс“ на телото, а еден од најпопуларните со години е – чаша топла вода со лимон веднаш по будењето. Според многумина, таа едноставна навика „ја поттикнува дигестијата“, „го чисти организмот“, „го зајакнува имунитетот“ и „дава сјај на кожата“. Но, колку од тоа е навистина точно и дали тоа е навистина најздравата опција?

Топла лимонада наутро – здрава рутина или преценет тренд?

Пиењето топла вода со лимон наутро всушност не е нова идеја – таа одамна постои во различни делови од светот, но последниве години стана особено популарна благодарение на Инстаграм и ТикТок. Многумина ја фалат како магичен утрински ритуал, но ефектите, според научните сознанија, сепак се нешто поскромни.

Она што лимонадата наутро сигурно го прави е тоа што помага во хидратација. Откако поминуваме седум до осум часа без внес на течности, една чаша вода – со или без лимон – навистина може да го поттикне метаболизмот и да помогне на дигестијата. Лимонот дополнително носи доза витамин Ц, кој е важен за имунитетот, здравјето на кожата и апсорпцијата на железо. Сепак, за навистина да се задоволи дневната потреба од овој витамин, би требало да изедете барем еден цел лимон – што ретко кој го прави.

Од друга страна, често споменуваната „детоксикација“ што наводно ја поттикнува лимонадата всушност нема медицинска потврда. Нашето тело веќе има сопствен систем за елиминирање на токсини – црн дроб, бубрези и лимфен систем – и не му е потребен посебен „окидач“ во форма на овошна киселина. Но тоа не значи дека лимонадата е лоша, напротив, ако ви одговара – слободно пијте ја. Само е важно да се знае дека не прави чуда.

Кај некои луѓе лимонот на празен желудник може да предизвика горушица, мачнина или иритација на желудникот, особено ако веќе имаат проблеми со гастритис или чувствителна слузница. Во таков случај, лимонадата е подобро да се пие со оброк или целосно да се избегнува.

Цитрусите се здрави – но не без предупредувања

Лимон, портокали, мандарини, грејп и лимета се меѓу најздравите видови овошје што можеме да ги консумираме, особено поради изобилството на витамин Ц, антиоксиданси и растителни влакна. Редовното јадење цитруси се поврзува со зајакнување на имунитетот, подобро здравје на срцето, поубава кожа и општo чувство на виталност. Освен тоа, цитрусите се достапни речиси во текот на целата година и лесно се вклучуваат во секојдневната исхрана – како ужина, додаток во салати, десерти или пијалаци.

Сепак, постојат неколку нешта на кои треба да се внимава. На пример, грејпфрут може да влијае на делувањето на одредени лекови, особено оние за намалување на крвниот притисок, регулирање на холестеролот или смирување, па лицата кои примаат терапија треба да се консултираат со лекар пред редовно да го консумираат ова овошје.

Исто така, поради високата киселост, цитрусите можат долгорочно да ја оштетат забната глеѓ ако често се јадат или пијат без потоа да се исплакнат устата со вода. Најбезбедно е лимонадата да се пие со сламка и забите да не се мијат веднаш потоа, за да не се оштети дополнително заштитата на забите.

Подобро изедете цел плод

Уште еден чест неспоразум се однесува на соковите. Додека целиот плод од портокал или грејп е полн со влакна и умерени количини природен шеќер, свежо исцедениот сок, иако „природен“ – содржи речиси исклучиво шеќер и вода, со значително помалку витамини и хранливи материи. Затоа е поздраво да се изеде овошјето отколку да се испие.

Заклучок: Лимонадата наутро нема да ви го „исчисти телото“, но може да помогне денот да го започнете лесно, хидрирани и со доза витамин. Цитрусите се одличен додаток во исхраната, но како и со сè – најдобро е да се консумираат умерено, свесно и без илузија дека еден лимон дневно менува сè.