Ситуацијата со пожарот на планината Готен станува сѐ поопасна и драматична, информираат од Територијалната противпожарна единица Берово (ТППЕ).
Пожарникарите, заедно со екипите од ШС Малешево, се веќе 24 часа на терен, но нивните ресурси се при крај, а огнената стихија брзо се шири кон месноста Широки Дол, каде што се загрозени викенд-куќи и населени места.
„Ситуацијата е најлоша што може да биде. Потребна ни е помош – веднаш и масовно. Ги повикуваме младите луѓе, компаниите, граѓаните од Берово и околните населени места да се организираат и приклучат во гаснењето на пожарот.
Малешевијата и порано знаела да се организира – сега е моментот повторно да покажеме единство и храброст! Да не дозволиме оваа природна катастрофа да прерасне во трагедија. Потребни се доброволци, алат, возила и сè што може да помогне во гаснењето! За повеќе информации и приклучување, јавете се или дојдете директно кај ТППЕ Берово“, стои во итниот апел од ТППЕ Берово.