Снегот денеска создаде потешкотии во сообраќајот во поголемиот дел од Босна и Херцеговина, а во Унско-санскиот кантон поради тоа беше откажана наставата во сите училишта.
На клучниот пат М-17 од северот на земјата кон Сараево, бројни камиони останаа заглавени во снегот, па сообраќајот на делницата меѓу Жепч и Маглај кај тунелот Караула е предмет на долготрајни задржувања и ограничувања.
Сообраќајот на главниот пат Градачац-Орманица е запрен, а воведена е и обврска за користење синџири за сите товарни возила на речиси сите планински превои, потврдија од Авто-мото клубот Босна и Херцеговина.
Во подрачјето на Херцеговина претежно врне дожд, но на сите кои планираат да патуваат од БИХАМК им е упатено предупредување внимателно да ја следат временската прогноза.
Метеоролозите прогнозираат дека до крајот на денот снегот во низините ќе достигне и до 30 сантиметри, а на планините снежната покривка повеќе од половина метар.