Цените на обработливото земјиште во Европската унија во 2023 година биле највисоки во Малта, а најниски во Хрватска, објави денеска Евростат.
Во 2023 година просечната цена на еден хектар обработливо земјиште во Европската унија изнесувала 11.791 евро, додека просечната годишна цена за изнајмување обработливо земјиште и/или постојани тревници била 173 евра по хектар, се додава во соопштението.
Податоците за цените се достапни за 22 земји од Европската унија, а во оваа категорија убедливо најскапа е Малта, каде хектар обработливо земјиште се продаваше во просек за 283.039 евра.
На второ место по просечна цена на овие имоти е Холандија со 91.154 евра по хектар, а на трето место е Луксембург со 42.540 евра по хектар.
За разлика од нив, најниски просечни цени на обработливото земјиште се регистрирани во Хрватска, 4.491 евра по хектар, Летонија 4.591 евра и Словачка 5.189 евра.
Податоци за закуп на обработливо земјиште и/или постојани пасишта се достапни за 21 земја од Европската унија. Највисока цена за изнајмување е регистрирана во Холандија, 914 евра по хектар, а најниска во Словачка била 67 евра, пишува Танјуг.
