Претседателот Вучиќ изјави дека против земјата веќе подолго време се води сериозна хибридна војна и нагласи дека досега имало повеќе од 25.000 непријавени собири, како и дека како претседател направил сè за да го сочува мирот и стабилноста во Србија.
„Како претседател на Србија направив сè за да го сочуваме мирот и стабилноста. Санкции кон НИС, но не само тие санкции, туку и сите притисоци на кои сме изложени од различни страни на светот. Повторувам, од различни страни на светот. Хибридното влијание кое доаѓа од различни страни на светот е нешто што ја загрозува Србија веќе подолго време. Основната причина е јасна. Тоа е независна и суверена политика што ја води Република Србија, која не ја води никој освен граѓаните на Србија“, изјави Вучиќ за РТС.
Тој нагласи дека токму поради тоа таа политика мора да биде урната.
Вучиќ така одговори на коментарот на водителот дека политичките поделби опасно се радикализираат во Србија, дека особено драматичен бил вчерашниот пример пред Народното собрание, и дека Србија веројатно се наоѓа во најкомплицираната ситуација од кога е претседател, како и на прашањето дека Уставот на Србија предвидува претседателот да го изразува државното единство на Република Србија и што лично ќе преземе за таа експлозивна ситуација во која се наоѓа земјата, така што тоа ќе биде добро за сите граѓани.
Вучиќ нагласи дека веќе една година трпат страшно насилство.
„Страшно, не може да биде пострашно. Стотици илјади пати луѓето биле запрени во своето движење по улиците на Србија. Стотици илјади пати. Одржани се над 25.000 криминални, илегални, непријавени собири, кои на крајот дури и ние ги обезбедувавме, иако се криминални собири, за да ја заштитиме безбедноста на тие лица, и тоа по моја иницијатива. И трошиме огромни пари. Десетици милиони евра потроивме како држава, само за да ги сочуваме тие луѓе кои се собираат на криминален начин, значи без пријава на собир, илегално, противзаконски или криминално“, рече Вучиќ.
