Научниците се уште се обидуваат да ги разберат ефектите од необичната ерупција на подводниот вулкан во Тонга во јануари, објави Асошиејтед прес.
Вулканот, познат како Хунга Тонга-Хунга Хаапаи, исфрли милиони тони водена пареа високо во атмосферата, според истражувањето објавено во списанието Science.
Научниците проценуваат дека ерупцијата ја зголемила количината на вода во стратосферата за околу пет проценти.
Сега истражувачите се обидуваат да проценат како оваа вода ќе влијае на атмосферата и дали може да придонесе за затоплување на површината на Земјата во следните неколку години.
Таков настан се случува во животот, вели водечкиот автор на студијата Холгер Вомел, научник од Националниот центар за атмосферски истражувања во Колорадо, САД.
Големите ерупции обично ја ладат планетата. Повеќето вулкани испуштаат големи количини на сулфур што ги блокира сончевите зраци, објасни Метју Тухи, климатолог од Универзитетот во Саскачеван, кој не бил вклучен во студијата.
Ерупцијата на вулканот во Тонга започна под океанот и исфрли многу повеќе вода од вообичаено. Бидејќи водената пареа делува како стакленички гас што ја задржува топлината, ерупцијата најверојатно ќе предизвика зголемување на температурите наместо намалување, рече Тухи.
Водената пареа ќе остане во горниот дел од атмосферата неколку години пред да се спушти понатаму, рече Тухи. Во исто време, дополнителната вода може да го забрза губењето на озонот во атмосферата, додаде Карен Розенлоф, климатолог во американската Национална управа за океани и атмосфера.