Повеќе од 82 илјади тони комунален отпад се собрани и транспортирани од скопските домаќинства и компании во текот на првите шест месеци од годинава, додека екипите на ЈП „Комунална хигиена – Скопје“ паралелно спроведувале акции за расчистување на диви депонии, одржување на јавната хигиена и едукација на најмладите.
Од претпријатието информираат дека во периодот јануари – јули 2026 година се подигнати и транспортирани вкупно 82.296 тони мешан комунален отпад. Истовремено, отстранети се 14.535 кубни метри отпад од диви депонии на територијата на сите скопски општини, при што најголемо количество – 2.385 кубни метри – е расчистено во Општина Центар.
Во рамки на редовните активности, претпријатието продолжува со машинско миење на булеварите и улиците во вечерните часови со автоцистерни, како и со секојдневно миење и метење на плоштадите, пешачките мостови, тротоарите на мостовите „Гоце Делчев“ и „Слобода“, како и на просторот во Старата скопска чаршија.
Во изминатите шест месеци, Еко-патролата на ЈП „Комунална хигиена – Скопје“ изготвила 274 записници против физички лица и претставници на компании затекнати при неправилно одлагање отпад. Најголем број прекршочни записници се издадени во Општина Чаир – 148, потоа во Гази Баба – 35, Аеродром – 30, Карпош – 21, Центар – 18, Ѓорче Петров – 16, Кисела Вода – 5 и Бутел – 1.
Покрај теренските активности, претпријатието реализирало и едукативни предавања и работилници во основните училишта и предучилишните установи во Скопје. Преку овие програми, 747 деца се запознале со правилното постапување со отпадот и важноста на неговата примарна селекција за зачувување на животната средина.