Водата од пет јавни чешми во Гевгелиско не ги исполнува условите за безбедност и квалитет за пиење, покажале лабораториските анализи на Центарот за јавно здравје во Велес. Поради утврдените отстапувања, Општина Гевгелија ја забрани употребата на водата за пиење и постави предупредувања на засегнатите локации.
Забраната се однесува на природната чешма „Мурџева“ во Негорци, спомен-чешмата „Катерина“ во Конско, природната чешма покрај патот во Старо Конско, природната минерална чешма во Смрдлива Вода, како и водата од водоводот во Смрдлива Вода.
Од Општината информираат дека редовните лабораториски испитувања покажале микробиолошки и физичко-хемиски отстапувања од пропишаните стандарди за безбедност и квалитет на водата за пиење.
„По добиеното известување со насоки за постапување од Центарот за јавно здравје – Велес, комуналниот и инспекторатот за животна средина при Општина Гевгелија преземаа активности за информирање на граѓаните. На наведените чешми се поставени табли со предупредување дека водата не е исправна за пиење“, соопштуваат од Општината.
Оттаму додаваат дека ќе се преземат соодветни мерки за отстранување на можните извори на загадување, како и активности за соодветен третман и дезинфекција.
Надлежните појаснуваат дека водата од природните чешми наведени во известувањето потекнува од природни извори и не е дел од водоснабдителниот систем преку кој се снабдуваат домаќинствата.
Општина Гевгелија апелира до граѓаните да ги почитуваат поставените предупредувања и да не ја користат водата од наведените чешми за пиење, со цел да се заштити здравјето и да се избегнат можните ризици од употреба на микробиолошки или физичко-хемиски неисправна вода.