Жена во Тајланд, која беше пронајдена жива во ковчег во будистички храм – беше спасена од донирање органи и кремација, затоа што нејзиниот брат немал официјална смртница.
Храмот Ват Рат Прахонг Там, будистички храм во провинцијата Нонтабури на периферијата на Бангкок, објави видео на својата Фејсбук страница на кое се прикажува жена што лежи во бел ковчег на задниот дел од пикап камион, пишува CBC, пренесува N1.
Таа бавно ги мрдала рацете и главата.
Пајрат Судоп, управител за општи и финансиски работи во храмот, изјави за агенцијата Асошиетед Прес во понеделникот дека братот на оваа 65-годишна жена ја донел од провинцијата Питсанулок за да биде кремирана.
Тој рече дека чуле слаб удар од ковчегот.
„Бев малку изненаден, па ги замолив да го отворат ковчегот, и сите се преплашија. Го видов како таа бавно ги отвора очите и чука по страната на ковчегот. Мора да чукала веќе некое време“, рече управителот.
Според Пајрат, братот на жената изјавил дека таа била прикована за кревет околу две години и престанала да реагира, а изгледало дека престанала да дише пред два дена.
Братот ја ставил во ковчег и патувал околу 480 километри до болница во Бангкок, каде што жената претходно изразила желба да донира свои органи.
Пајрат рече дека болницата не сакала да го прими телото на жената затоа што братот немал официјална смртница. Кога братот дошол во храмот за кремација, исто така му била одбиена услугата поради недостиг на документ.
Управителот на храмот рече дека, додека му објаснувал како да добие смртница, слушнал удари. Персоналот на храмот ја проценил нејзината состојба и ја испратил во блиската болница на лекување. Абатот на храмот изјави дека храмот ќе ги покрие нејзините медицински трошоци, според зборовите на Пајрат.
Слични случаи кога личност е пронајдена жива во погребни домови или мртвачници се забележани и претходно.
Во јуни 2024, 74-годишна жена од Небраска, прогласена за мртва во дом за нега, беше пронајдена како дише во погребно претпријатие два часа подоцна.
Во јануари 2023, 66-годишна жена беше прогласена за мртва во установа за нега во Ајова откако вработените рекле дека „не чувствуваат пулс“ и дека жената не дише. Кога беше одведена во погребен дом, жената се разбуди „вдишувајќи воздух“.
Истата година, погребен дом во Њујорк пронашол 82-годишна жена жива и како дише, кратко откако била прогласена за мртва во дом за нега.
Во 2022 година, пет службеници во Шангај, Кина, беа казнети, а на лекар му беше одземена лиценцата откако видео покажало како работниците во погребен дом враќаат вреќа со тело што содржела жива личност во дом за пензионери.
