Силниот земјотрес што ноќеска ја погоди јужна Италија не бил почувствуван само на Апенинскиот Полуостров, туку и во повеќе земји од регионот. Според сведоштва на граѓани објавени на Европско-медитеранскиот сеизмолошки центар, потресот бил забележан и во Хрватска, Босна и Херцеговина, Црна Гора, Албанија и Грција.
Најмногу реакции пристигнале од јужните италијански региони Калабрија и Сицилија, каде што жителите опишуваат силно тресење кое ги разбудило во текот на ноќта. Потресот бил почувствуван и во Неапол, Базиликата и Пуља.
Граѓаните од Месина сведочат дека земјотресот траел околу десет секунди и предизвикал нишање на лустери, мебел и други предмети во домовите. Слични искуства споделиле и жителите на Реџо Калабрија, каде што се почувствувало движење на кревети и мебел во становите.
Во Вила Сан Џовани дел од жителите пријавиле повеќе последователни движења на тлото, а некои навеле дека вториот удар бил уште поинтензивен од првиот.
И покрај тоа што земјотресот бил почувствуван на широко подрачје, италијанските власти засега не пријавуваат повредени лица ниту материјална штета. Според првичните проценки, причината за тоа е големата длабочина на хипоцентарот и фактот што епицентарот бил лоциран во морето, што значително го намалило разорниот ефект врз копното.
По потресот, италијанската цивилна заштита активирала кризен штаб во Рим и воспоставила постојана комуникација со локалните власти во подрачјата најблиску до епицентарот. Од општините Четраро, Ламеција Терме и Амантеја не се пријавени штети, а проверките на инфраструктурата и објектите долж брегот на Калабрија продолжуваат.
Надлежните служби и натаму ја следат состојбата, но засега нема индиции дека земјотресот предизвикал посериозни последици.