Уникатниот златник изработен од Кралската канадска ковница е продаден на аукција за рекордна сума од повеќе од 1,5 милиони долари, објавија денеска канадските медиуми.
Златната монета тежи дури 10 килограми, а направена е според дизајнот на уметникот Џејмс Харт, припадник на домородниот народ Хаида кој ги населува островите западно од брегот на Канада, јавува канадскиот јавен сервис ЦТВ Њус.
Продадена е на анонимен купувач за сума од 1.561.250 долари на онлајн аукцијата на куќата „Hefel fine art“.
Златната монета прикажува фигури и мотиви на традиционалната уметност Хаида, вклучувајќи шаман, орел, дабар, гавран, кит орка и мечка, како и штит што го носат припадниците на оваа нација.