Шведската премиерка, социјалдемократката Магдалена Андерсон, го призна поразот на оспорените парламентарни избори, на кои тесно победи четирипартискиот десничарски опозициски блок, објави Ројтерс.
Иако останува да се пребројат уште неколку гласови, резултатите покажуваат дека победил десничарскиот блок, изјави денеска Андерсон, која минатата година стана првата жена премиер на Шведска. Таа посочи дека десницата ја престигнала левицата „за еден или два мандата – мало мнозинство, но мнозинство“.
Утре ќе побарам да ме ослободат од функцијата, изјави шведскиот премиер на прес-конференција.
Умерената коалициска партија, шведските демократи, демохристијаните и либералите досега имаат водство од едно место по изборите во недела. Според последните податоци на изборните органи, сепак, се чини дека четирите партии најверојатно ќе добијат вкупно 176 места во парламентот од 349 места, наспроти 173 места за левиот центар.
Резултатите допрва треба да бидат официјално потврдени, што најверојатно ќе се случи во текот на викендот, забележа Ројтерс.
Изборите означуваат пресврт во шведската политика бидејќи антиимигрантските Шведски демократи, одбегнати од сите големи партии уште од првото влегување во парламентот во 2010 година, сега се на работ да стекнат влијание во државната политика. Таа освои 20,6 отсто од гласовите, пред партијата на Умерената коалиција, која доби 19,1 отсто.
Водачот на шведските демократи Ими Окешон рече дека неговата партија „ќе биде конструктивна и движечка сила“ во враќањето на безбедноста во земјата. Крајно време е „да се стави Шведска на прво место“, нагласи тој, цитиран од Асошиејтед прес.
Лидерот на партијата Умерена коалиција, Волф Кристершон, најави дека веќе почнува да работи на формирање влада. Сега ќе воведеме ред во Шведска“, напиша тој на Фејсбук.