Самоубиството на четиринаесетгодишниот Паоло Мендико, кој живеел надвор од градот Латина, на околу сто километри од Рим, предизвика силни емоции и шок низ Италија.
Паоло го извршил самоубиството во својата спална соба, неколку минути откако им испратил порака на своите соученици: „Во училиште, чувајте ми место во првиот ред“, напишал тинејџерот.
Семејството изјавува дека Паоло бил жртва на училишно малтретирање и хомофобични напади. Во училницата го нарекувале „малечко девојче“ и „Паола“.
Тој бил добар ученик, сакал риболов и свирел бас. Дури и по промена на училиште, малтретирањето продолжило во првата година од средното училиште.
Постариот брат на Паоло, во писмо до папата Лав XIV, премиерката Џорџа Мелони и министерот за образование Џузепе Валдитара, повика на итни мерки за спречување на самоубиства кај тинејџери.
„Смртта на мојот брат покажува неуспех на нашето општество“, пишува Иван Мендико.
Мајката додава дека на погребот на Паоло присуствувал само еден од неговите соученици, а во минатото наставниците охрабрувале малтретирање и ги игнорирале нивните жалби.
Наставниците негираат каква било одговорност, но италијанскиот министер за образование нареди итна административна истрага, додека обвинителството во Касино го истражува случајот, со фокус на кривичното дело поттикнување на самоубиство.
„Малтретирањето, особено преку социјалните медиуми, за жал се зголемува низ цела Европа и е огромен проблем“, истакна министерот Валдитара.
Политичките партии ја нагласија важноста од брз и ефикасен одговор на насилното однесување против адолесцентите, како во училиштата така и надвор од нив.
Според неодамнешна студија, 19% од децата на возраст од 11 до 13 години се жртви на малтретирање, вклучително и хомофобија, што го зголемува ризикот од депресија и самоубиствени тенденции.