Министерот за внатрешни работи Панче Тошковски денеска присуствуваше на показната вежба на Територијалната противпожарна бригада на Град Скопје во Автокоманда, која се одржа по повод Денот на пожарникарите и јубилејот од 190 години организирано противпожарно делување во Скопје.
Тошковски упати благодарност и честитки до сите пожарникари за нивната секојдневна посветеност и храброст во спасување човечки животи, домови и имот. Тој нагласи дека станува збор за професија која бара дисциплина, пожртвуваност и постојана подготвеност да се стави туѓиот живот пред сопствениот.
„Пожарникарите и полициските службеници имаат многу заедничко бидејќи и едните и другите се постојано будни, секогаш подготвени да реагираат кога граѓаните имаат најголема потреба од помош. Тоа се луѓе кои не прашуваат кога е тешко, туку веднаш застануваат во заштита на безбедноста, сигурноста и животот на граѓаните“, порача Тошковски.
Тој додаде дека денешната вежба уште еднаш ја потврдила важноста на подготвеноста, професионалноста и координацијата на службите за безбедност во државата.
„Нека е честит Денот на пожарникарите! Благодарност за вашата служба, храброст и посветеност“, порача министерот.