Конвој на Противпожарната бригада на Град Скопје тргна кон Мариово, каде ќе помогне во справувањето со големиот пожар што го зафати регионот.
Градоначалникот на Скопје, Орце Ѓорѓиевски, информираше дека помошта е испратена на барање на директорот на Дирекцијата за заштита и спасување, Стојанче Ангелов.
„Кога гори македонска земја, нема граници. Има само една обврска – да бидеме заедно, да си помогнеме и да го заштитиме секој човечки живот, секој дом и секоја педа од нашата татковина“, порача Ѓорѓиевски.
Тој им посака безбеден пат на скопските пожарникари и упати благодарност до сите пожарникари и други служби кои се на терен и се борат со пожарите низ земјата.
Од Град Скопје велат дека ќе продолжат да помагаат таму каде што има потреба од дополнителни сили и опрема за справување со огнената стихија.