Силно невреме следено со поројни дождови, град и силен ветар денеска предизвика хаос и материјална штета низ Кипар, а температурите на островот нагло паднаа за 10 степени, јавува МИА.
Во близина на Ларнака, 45-годишен маж се здобил со изгореници по удар од гром и е хоспитализиран, додека ударите на гром предизвикаа и дефекти на електричната мрежа и прекини во снабдувањето со струја. Во близина на Аја Напа целосно е уништен туристички чамец, а во тек се акција за спасување и пренесување на копно на патниците од уште две пловила. Во меѓувреме, во морскиот акваториум кај Ларнака е забележано и торнадо.
Поради лошите временски услови, вкупно 11 летови кон аеродромите во Ларнака и Пафос беа пренасочени, а забележани се и големи доцнења во авионскиот сообраќај. Властите преку системот „CY-Alert“ испратија предупредување до граѓаните да не излегуваат без потреба и да останат во своите домови, додека метеоролозите најавуваат дека нестабилното време ќе продолжи до крајот на денот.